وسكەمەندەگى وبلىستىق دراما تەاتردا وسى مادەنيەت ورداسىنىڭ نەگىزىن قالاۋشى ونەرپازداردىڭ ءبىرى, قازاق ترۋپپاسىنىڭ بەلدى اكتريساسى گۇلباقىت باقتىباەۆانىڭ بەنەفيسى ءوتتى.
ەڭبەك جولىن زايسان حالىق تەاترىنان باستاپ, كەيىن اقجار جانە جاڭالىق حالىق تەاترلارىندا اكتريسا ءھام رەجيسسەر قىزمەتتەرىن اتقارىپ, 2002 جىلى وبلىس ورتالىعىنا كەلگەن تالانت يەسى بۇل كۇنى ارىپتەستەرىنىڭ جىلى لەبىزىن ەستىپ توردە شالقايىپ وتىرعان جوق, ۇيرەنگەن ساحناسىنا شىعىپ, ونەرىن پاش ەتتى. كورەرمەندەر نازارىنا ء«تىل تابىسقاندار» كومەدياسىن ۇسىنىپ, باستى ءرولدى سومداپ, جانكۇيەرلەرىنىڭ قوشەمەتىنە بولەندى.
جالپى, گۇلباقىت باقتىباەۆانى ارىپتەستەرى كومەديا جانرىنا كەلگەندە قامشى سالدىرمايتىن اكتريسا رەتىندە تانيدى. ۇلگىلى, ونەگەلى, ونەرلى وتباسى رەتىندە ەرەكشە قۇرمەتتەيدى. «وسكەمەندە قازاق تەاترى قۇرىلعاننان بەرى گۇلباقىتپەن قاناتتاسا ەڭبەك ەتىپ كەلەمىز. ومىرلىك سەرىگى بەلگىلى اكتەر قانات نيازبەكوۆ تە وسى تەاتردا جۇمىس ىستەيدى. اكتريسانىڭ ەرەكشەلىگى سول, ۇنەمى شىعارماشىلىق ىزدەنىستە جۇرەدى. ونىڭ ەڭبەكقورلىعىنا, ىزدەنىسىنە ءتانتىمىز. وسىدان بىرەر جىل بۇرىن قىرعىزستاندا ۇلكەن تەاتر فەستيۆالى بولدى. ءبىز جەڭىشگۇل وزبەكوۆانىڭ «تولعاق» سپەكتاكلىن اپاردىق. مەن ۇماي ەنەنىڭ, ول مەنىڭ كەلىنىم رولىندە وينادى. سول بايقاۋدا ءبىز ءبىرىنشى ورىندى يەلەندىك. گۇلباقىت بالا كوتەرە الماي, ناۋقاستانعان, ومىردەن ءتۇڭىلىپ, ءتىپتى ءوزىن-ءوزى ولىمگە قيۋعا دەيىن باراتىن كەلىنشەكتىڭ ءرولىن سومدادى. وسى رولدە ارىپتەسىمدى باسقا ءبىر قىرىنان تانىعانداي بولدىم», - دەيدى اكتريسانىڭ ارىپتەسى سايراش قوپاباەۆا.
شارا بارىسىندا اكتريسانى قازاق تەاترىنىڭ كوركەمدىك جەتەكشىسى ساحان اكەلەەۆ, جاستار تەاترىنىڭ كوركەمدىك جەتەكشىسى ايدىن سالبانوۆ پەن تەاتردىڭ ورىس ترۋپپاسىنىڭ ۇجىمى قۇتتىقتاپ, جىلى لەبىزدەرىن ءبىلدىردى.
ازامات قاسىم, «ەگەمەن قازاقستان»